लॉकडाऊनबाबत निर्णय कोण घेणार?; मुख्यमंत्री ठाकरे यांनी दिली ‘ही’ महत्त्वाची सूचना

लॉकडाऊन लागण्याची शक्यताही बळावत आहे. या अनुषंगाने आता मंत्री अनिल परब यांनी दिली ही माहिती

0

मुंबई :राज्यात करोनाचा ग्राफ पुन्हा वाढू लागला आहे. मुख्यमंत्री उद्धव ठाकरे हे सातत्याने स्थितीवर लक्ष ठेवून आहेत. याबाबत मुख्यमंत्र्यांनी आढावा बैठक घेऊन महत्त्वाच्या सूचनाही दिल्या आहेत. नियम पाळले गेले नाहीत तर पुन्हा लॉकडाऊन लावावा लागेल, असा इशाराही मुख्यमंत्र्यांनी दिलेला आहे.ठाकरे सरकारमधील एक महत्त्वाचे मंत्री अॅड. अनिल परब यांनी आज लॉकडाऊनबाबत महत्त्वाची माहिती माध्यमांना दिली. राज्यावर पुन्हा एकदा लॉकडाऊनचे संकट घोंगावत आहे.

राज्यभरात लॉकडाऊन लागण्याची शक्यता तूर्त कमी असली तरी ज्या भागांत करोनाचे रुग्ण वाढत आहेत त्या भागात लॉकडाऊन लावले जाण्याची शक्यता आहे. मुख्यमंत्री उद्धव ठाकरे आणि उपमुख्यमंत्री अजित पवार यांची आज सकाळीच याबाबत तातडीची बैठक झाली. बैठकीत अकोला, अमरावती आणि यवतमाळ जिल्ह्यातील सद्यस्थितीचा आढावा घेण्यात आला. या तिन्ही जिल्ह्यांत करोनाचे रुग्ण वेगाने वाढत आहेत. या पार्श्वभूमीवर तातडीने कठोर पावले उचलण्याच्या सूचना मुख्यमंत्र्यांनी संबंधित जिल्हाधिकाऱ्यांना दिल्या आहेत. त्यानुसार विदर्भातील अमरावती जिल्ह्यात लॉकडाऊन लावण्याचा निर्णय घेण्यात आला आहे. त्यासोबतच यवतमाळ जिल्ह्यातही २८ फेब्रुवारीपर्यंत लॉकडाऊन लावण्याचा निर्णय झाल्याचे कळते आहे. त्यास अद्याप अधिकृत दुजोरा मिळालेला नाही. याअनुषंगाने परिवहन मंत्री अॅड. अनिल परब यांनी मोठे विधान केले आहे. करोनाचे रुग्ण पुन्हा वाढत असल्याने कडक नियम लागू करण्याची आवश्यकता आहे. त्याबाबत मुख्यमंत्र्यांनी सर्व संबंधितांना स्पष्ट शब्दांत सूचना दिलेल्या आहेत. त्यात स्थितीचा आढावा घेऊन लॉकडाऊन करायचा की नाही, याबाबत निर्णय घेण्याचा अधिकारही मुख्यमंत्र्यांनी स्थानिक प्रशासनाला दिलेला आहे, अशी माहिती परब यांनी दिली. दरम्यान, मुख्यमंत्र्यांच्या निर्देशांनंतर अनेक जिल्ह्यांत कठोर पावले टाकण्यात येत आहेत. नगर, सांगली, सिंधुदुर्ग या जिल्ह्यांत मास्कबाबत कडक धोरण अवलंबण्यात आले आहे. पुण्यात जमावबंदीचे पाऊल उचलण्यात आले आहे. मुंबईतही आजपासून करोनाबाबतचे निर्बंध कठोरपणे अमलात आणण्याची सूचना पालिका आयुक्तांनी दिली आहे. जे नियम पाळणार नाहीत, त्यांच्यावर वेळप्रसंग गुन्हे दाखल करण्याचे निर्देशही आयुक्तांनी दिले आहेत. त्यामुळे येत्या काळात नियम मोडणाऱ्यांची खैर नाही, असेच चित्र सध्या राज्यभरात आहे.

Loading...

Leave A Reply

Your email address will not be published.

This site uses Akismet to reduce spam. Learn how your comment data is processed.