नितीश कुमार सातव्यांदा बिहारच्या मुख्यमंत्रिपदाची घेणार शपथ

देवेंद्र फडणवीस शपथविधीला हजर राहणार, तेजस्वी यादवांनी नाकारले निमंत्रण

0

पाटणा : बिहारमध्ये बहुमत मिळवल्यानंतर भाजप- संयुक्त जनता दलाने आज मुख्यमंत्र्यांसह मंत्र्यांच्या शपथविधीचे आयोजन केले आहे. या शपथविधीसाठी केंद्रीय गृहमंत्री अमित शाह आणि भाजप अध्यक्ष जे पी नड्डा, महाराष्ट्रातील विरोधी पक्षनेते आणि बिहार भाजपचे प्रभारी देवेंद्र फडणवीस हजर राहणार आहेत. मात्र बिहारच्या निवडणुकीत सर्वाधिक चर्चेत राहिलेले राष्ट्रीय जनता दलचे नेते तेजस्वी यादव यांनी शपथविधीचे निमंत्रण स्वीकारलेले नाही.
नितीश कुमार सातव्यांदा बिहारच्या मुख्यमंत्रिपदाची शपथ घेणार आहेत. नितीश कुमार मुख्यमंत्रिपदी विराजमान होणार आहेत, तर जेडीयूपेक्षा जास्त जागा मिळवलेल्या भाजपने दोन उपमुख्यमंत्रिपदे पदरात पाडून घेतली. महत्त्वाचे म्हणजे सुशीलकुमार मोदी यांच्याऐवजी भाजपने तारकिशोर प्रसाद आणि रेणू देवी यांना उपमुख्यमंत्रिपदे देण्याचा निर्णय घेतला आहे.
दिग्गजांना निमंत्रण, तेजस्वी यादवांचा नकार

नितीश कुमार यांचा शपथविधी सायंकाळी 4.30 वाजता राजभवनात होणार आहे. या सोहळ्याला दिग्गज नेत्यांना निमंत्रण देण्यात आले आहे. मात्र तेजस्वी यादव यांनी शपथ सोहळ्याला येण्यास नकार दिला आहे. मात्र त्याबाबतचे कारण अद्याप अस्पष्ट आहे.
यापूर्वी तेजस्वी यादवांनी बिहार निवडणूक मतमोजणीत गडबड झाल्याचा आरोप केला होता. बिहारमध्ये 10 नोव्हेंबरला मतमोजणी झाली. मात्र सुरुवातीला आघाडीवर असणारे आरजेडी-काँग्रेस नंतर पिछाडीवर पडले. त्यामुळे तेजस्वी यादवांनी निकालाबाबत शंका व्यक्त केली आहे.
शपथविधीला कोण कोण हजर राहणार?

नितीश कुमारांच्या शपथविधीला केंद्रीय गृहमंत्री अमित शाह आणि भाजप अध्यक्ष जे. पी. नड्डा, महाराष्ट्रातील विरोधी पक्षनेते आणि बिहार भाजपचे प्रभारी देवेंद्र फडणवीस हजर राहणार आहेत. याशिवाय भाजप नेते भूपेंद्र यादव, संजय जायस्वाल, नागेंद्र जी, जेडीयू नेते विजय कुमार चौधरी आणि आरसीपी सिंह ही मोठी नावं दिसणार आहेत.

नितीश कुमारांसोबत कोण कोण शपथ घेणार?

बिहार विधानसभेची सदस्य संख्या 243 असून मंत्रिमंडळात एकूण 36 मंत्र्यांचा समावेश करता येऊ शकतो. पहिल्या टप्प्यात 16 मंत्र्यांना शपथ देण्याचा निर्णय झाल्याची माहिती आहे. जेडीयूकडून बिजेंद्र यादव, अशोक चौधरी, विजय चौधरी, श्रवण कुमार आणि लेसी सिंह यांना संधी मिळण्याची शक्यता आहे. भाजपकडून तारकिशोर प्रसाद, रेणू देवी, प्रेम कुमार, नंदकिशोर यादव, कृष्ण ऋषी, विजय सिन्हा, राणा रणधीर सिंह, प्रमोद कुमार, रामनारायण मंडल, नितीश मिश्रा, नितीन नवीन, सम्राट चौधरी, संजीव चौरसिया यांची नावे आघाडीवर आहेत. विकासशील इन्सान पार्टीचे मुकेश साहनी आणि हिंदुस्थान आवाम मोर्चाचे संतोष मांझी शपथ घेणार आहेत.

भाजपला दोन  उपमुख्यमंत्रिपदाची लॉटरी?

बिहारमध्ये भाजपने चेहरा बदलण्याचा निर्णय घेतला आहे. 10 वर्षांहून अधिक काळ उपमुख्यमंत्रीपद भूषवणाऱ्या सुशीलकुमार मोदी यांना डच्चू देण्यात आला. भाजपने तारकिशोर प्रसाद यांना उपमुख्यमंत्रीपदाची संधी देण्याचा निर्णय घेतला आहे. दोन उपमुपख्यमंत्री देण्याचा निर्णय झाल्यास रेणू देवी यांचे नाव आघाडीवर आहे.

भाजपने रविवारी तारकिशोर प्रसाद यांची विधिमंडळ पक्षाच्या नेतेपदी निवड केली आहे. रेणूदेवी यांची उपनेतेपदी निवड करण्यात आली आहे. सुशीलकुमार मोदी यांना केंद्रीय मंत्रिमंडळात संधी देण्यात येणार असल्याची चर्चा आहे.

बिहार विधानसभा निवडणूक निकाल 2020

बिहार विधानसभेच्या एकूण 243 जागांपैकी 125 जागांवर एनडीएला विजय मिळवला होता. यामध्ये भाजपला 74 तर संयुक्त जनता दलाच्या उमेदवारांना 43 जागांवर विजय मिळाला होता.

बिहारमधील पक्षीय बलाबल

भाजप – 74
जेडीयू – 43
आरजेडी – 75
काँग्रेस – 19
एमआयएम – 05
सीपीआय (एमएल) – 12
सीपीआय (अन्य) – 4
हिंदुस्तान आवाम मोर्चा – 04
विकासशील इन्सान पार्टी – 04
अपक्ष/इतर – 03
एकूण – 243

Loading...

Leave A Reply

Your email address will not be published.

This site uses Akismet to reduce spam. Learn how your comment data is processed.