कोरोना लस कधी येईल माहिती नाही, पण सरकारकडून नियोजन सुरू- राजेश टोपे

सरकारची कोल्ड स्टोरेज वाढवणे त्याची साठवण क्षमता यावर तयारी सुरू

0

मुंबई : देशासह राज्यात कोरोनाचा प्रादुर्भाव पुन्हा वाढण्याची शक्यता व्यक्त केली जात आहे. अशावेळी कोरोना लस निर्मितीकडे सरकारसह सर्वसामान्य नागरिकांचे लक्ष लागले आहे. पंतप्रधान नरेंद्र मोदी यांनीही नुकताच कोरोना लस निर्मिती करणाऱ्या कंपन्यांना भेट देत लसीचा आढावा घेतला आहे. यावर लस कधी येणार ते माहिती नाही, पण राज्य सरकारकडून योग्य नियोजन करण्यात येत असल्याची माहिती आरोग्यमंत्री राजेश टोपे यांनी दिली आहे.

पंतप्रधान मोदी यांनी लसीचा आढावा घेतला आहे. ती लस कधी येणार ते माहिती नाही. पण लस आली तर तिचे योग्य नियोजन सरकार करत आहे. कोल्ड स्टोरेज वाढवणे, त्याची साठवण क्षमता यावर सरकारची तयारी सुरू आहे, अशी माहिती राजेश टोपे यांनी दिली आहे. मुख्य सचिवांच्या अध्यक्षतेखाली एक समिती नेमण्यात आली आहे. केंद्र सरकारने दिलेल्या सूचनांप्रमाणे सर्व खबरदारी घेतली जात असल्याचे टोपे यांनी सांगितले.

पहिली लस कोरोना योद्ध्यांनाच- टोपे

कोरोनाची लस आल्यानंतर प्रथम श्रेणीत ती लोकप्रतिनिधींना देण्यात यावी, अशी मागणी झाल्याची चर्चा सध्या सुरू आहे. त्यावर, अशी कुठलीही मागणी झालेली नाही. लस आल्यानंतर ती पहिल्यांदा डॉक्टर आणि पोलिस कर्मचाऱ्यांनाच देण्यात येईल, असे आरोग्यमंत्र्यांनी स्पष्ट केले. कोरोना लस कुणाला द्यावी, त्याचे वर्गिकरण कसे व्हावे याचे संपूर्ण नियंत्रण केंद्र आणि राज्य सरकारकडे आहे. प्रोटोकॉलनुसारच लस देण्यासंदर्भात विचार केला जाईल, असे टोपे यांनी माध्यमांना सांगितले.

पंतप्रधान मोदींकडून लस निर्मितीचा आढावा

भारतात अहमदाबाद, हैदराबाद आणि पुण्यात कोरोना लसीची निर्मिती सुरू आहे. पुण्यातील सीरम इन्स्टिट्यूटकडून निर्माण केली जाणारी लस अंतिम टप्प्यात असल्याची माहिती आहे. या लसीचा आढावा घेण्यासाठी पंतप्रधान नरेंद्र मोदी 28 नोव्हेंबरला पुणे दौऱ्यावर आले होते. अहमदाबादमधील झायडस कॅडिला, हैदराबादेतील भारत बायोटेक आणि पुण्यातील सीरम इन्स्टिट्यूटमध्ये निर्मिती केली जाणाऱ्या लसीचा आढावा पंतप्रधान नरेंद्र मोदी यांनी घेतला. ऑक्सफर्ड विद्यापीठ, अॅस्ट्रा झेनेका आणि सीरम इन्स्टिट्यूटद्वारे संयुक्तरित्या कोरोना लसीची निर्मिती सुरू आहे. तर लसीच्या वितरणाबाबत केंद्र सरकारन् आतापासूनच मोठी तयारी सुरु केली आहे.

महिनाभर क्षय आणि कुष्ठरुग्ण संयुक्त शोध अभियान

कोरोनाकाळात राज्यभरात निदानापासून वंचित राहिलेल्या क्षयरुग्ण व कुष्ठरुग्णांचा शोध घेण्यासाठी घरोघरी जाऊन तपासणी करण्यात येणार आहे. त्यासाठी सर्व जिल्हा व महानगरपालिका क्षेत्रात ‘संयुक्त सक्रीय क्षयरुग्ण शोध व कुष्ठरुग्ण शोध अभियान’ उद्यापासून म्हणजे 1 डिसेंबर ते 31 डिसेंबर 2000 या कालावधीत राबविले जाणार आहे, अशी माहिती आरोग्यमंत्री राजेश टोपे यांनी दिली आहे.

Loading...

Leave A Reply

Your email address will not be published.

This site uses Akismet to reduce spam. Learn how your comment data is processed.