शिवजयंती उत्सवाचे रस्त्यावर पडलेले होर्डिंग उभारताना विजेच्या धक्क्याने दोघांचा जागीच मृत्यू

वडनेरदुमाला येथे दोन तरुणांच्या मृत्यूची घटना, शुक्रवारी दुपारी सव्वादोनच्या सुमारास घडली

0

नाशिक : शिवजयंती उत्सवाचे रस्त्यावर पडलेले होर्डिंग उभे करताना विजेच्या धक्क्याने दोन तरुणांचा जागीच मृत्यू झाल्याची घटना वडनेरदुमाला येथे शुक्रवारी दुपारी सव्वादोनच्या सुमारास घडली.राज मंगेश पाळदे (वय २१, रा. हगवणे मळा, सौभाग्यनगर, विहितगाव) आणि अक्षय किशोर जाधव (२३, रा. वडनेरदुमाला) अशी मृत्युमुखी पडलेल्या दोन तरुणांची नावे आहेत.

वडनेरदुमाला येथे रस्त्यावर पडलेले शिवजयंती उत्सवाचे होर्डिंग उभे करताना विजेच्या धक्क्याने दोन तरुणांचा जागीच मृत्यू झाल्याची घटना शुक्रवारी दुपारी सव्वादोनच्या सुमारास घडली. राज मंगेश पाळदे (वय २१, रा. हगवणे मळा, सौभाग्यनगर, विहितगाव) आणि अक्षय किशोर जाधव (२३, रा. वडनेरदुमाला) अशी मृत्युमुखी पडलेल्या दोन तरुणांची नावे आहेत.दरम्यान, या घटनेत दोन तरुण जखमी असल्याचे समजते. त्यापैकी राहुल पवार (रा. वडनेरदुमाला) याच्यावर पाथर्डी फाटा येथील सप्तशृंगी रुग्णालयात उपचार सुरू असून, दुसऱ्या जखमीचे नाव समजू शकलेले नाही. वडनेरदुमाला गावाजवळील रस्त्यावर शिवजयंतीनिमित्त मोठ्या संख्येने होर्डिंग लावण्यात आलेले आहेत. गुरुवारी सायंकाळी झालेल्या वादळी वाऱ्यात एक होर्डिंग रस्त्यात पडले होते. रस्त्यात अडथळा होतो म्हणून राज पाळदे आणि अक्षय जाधव या दोघांनी होर्डिंग उभे करण्याचा प्रयत्न केला असता, होर्डिंगच्या लोखंडी फ्रेमचा वीजवाहिनीला स्पर्श झाला. उच्च दाबाच्या क्षमतेचा वीजप्रवाह उतरल्याने दोघेही या विजेच्या धक्क्याने जागीच मृत्युमुखी पडले. त्यांना नाशिकरोड येथे बिटको रुग्णालयात दाखल केले. मात्र, तत्पूर्वीच त्यांचा मृत्यू झाला होता. शहरात शिवजयंतीचा उत्साह शिगेला पोहोचलेला असतानाच या दोन तरुणांच्या अपघाती मृत्यूमुळे संपूर्ण शहरात हळहळ व्यक्त होत आहे. अभियांत्रिकीचा विद्यार्थी असलेल्या राजच्या मागे आई-वडील आणि बहीण, असा परिवार आहे. अक्षयच्या मागे आई-वडील, दोन मोठे भाऊ, असा परिवार आहे. अक्षयच्या कुटुंबाची आर्थिक परिस्थिती खूपच बेताची आहे. तो आत्याकडे राहायला आला होता. आत्याचे कुटुंब जेजुरीला दर्शनासाठी जाणार होते. ते अक्षयलाही सोबत घेणार होते. मात्र, तत्पूर्वीच अक्षयवर काळाने झडप घातली.

Loading...

Leave A Reply

Your email address will not be published.

This site uses Akismet to reduce spam. Learn how your comment data is processed.